Kiungo nyota wa Klabu ya Yanga SC,Pacome Zouzoua, ameandika historia mpya kwa kuitwa katika kikosi cha timu ya taifa ya Ivory Coast – “The Elephants”, kuwa mchezaji pekee anayecheza ligi ya ndani barani Afrika kwenye kikosi kilichojaa mastaa wanaosakata soka katika ligi kubwa za Ulaya.
Zouzoua amepewa heshima hiyo kubwa na kocha mkuu wa timu ya taifa ya Ivory Coast, Emerse Faé, ambaye ametangaza kikosi cha wachezaji 23 watakaoshiriki katika michezo miwili muhimu ya kufuzu Kombe la Dunia 2026. Ivory Coast itavaana na Seychelles mnamo Oktoba 10, kabla ya kukutana na Harambee Stars ya Kenya Oktoba 14, michezo yote ikiwa ni sehemu ya hatua ya makundi ya kufuzu kwa bara la Afrika.
Katika kikosi hicho, Zouzoua anajikuta akiwa mchezaji wa pekee kutoka ligi ya ndani – Ligi Kuu ya Tanzania Bara – jambo linaloonesha ni kwa namna gani amevutia jicho la kocha na wataalamu wa soka Ivory Coast licha ya kucheza nje ya bara la Ulaya. Hili ni jambo linalotia moyo si tu kwa Zouzoua binafsi, bali pia kwa mashabiki wa Yanga SC na watanzania kwa ujumla, kwani linathibitisha ubora na ushindani wa ligi ya ndani.
Kikosi hicho kinajumuisha wachezaji wanaocheza katika vilabu vikubwa kama Manchester United,Villarreal,Galatasaray,Çaykur Rizespor,Nottingham Forest. Hali hiyo inaifanya nafasi ya Zouzoua kuwa ya kipekee, kwani anatarajiwa kuwa chachu ya ushindani kutoka kwa wachezaji wa ndani ambao mara nyingi hupuuzwa kwenye timu za taifa barani Afrika.
Zouzoua amekuwa nguzo muhimu katika mafanikio ya Yanga SC kwa misimu kadhaa, akitoa mchango mkubwa kwenye mechi za ligi na michuano ya kimataifa kama Ligi ya Mabingwa Afrika. Umahiri wake wa kupiga pasi za mwisho, kuunganisha safu ya kiungo na ushambuliaji, pamoja na nidhamu ya hali ya juu, vimeonekana kumshawishi kocha Emerse Faé kumpa nafasi kwenye kikosi hicho.
🎯 Usipitwe!
Kuwa wa kwanza kupata habari za moto za michezo nchini Tanzania na duniani kwa ujumla, moja kwa moja kwenye barua pepe yako kutoka SportsLeo Bongo!
- ✅ Matokeo ya mechi
- ✅ Uchambuzi wa kina
- ✅ Habari za ndanii ya timu zako pendwa
✉️ Quality content, no spam. Unsubscribe anytime.
Kwa kuitwa kwake, Zouzoua ameweka rekodi ya kuwa mmoja wa wachezaji wachache wanaocheza ligi ya Tanzania na kuitwa kwenye timu ya taifa ya taifa kubwa kama Ivory Coast. Hii ni dalili kwamba vipaji kutoka ligi ya ndani barani Afrika vinazidi kutambuliwa kimataifa.
Mashabiki wa Yanga SC na Watanzania kwa ujumla watakuwa wakimfuatilia kwa karibu Zouzoua katika michezo hiyo miwili, wakitumaini atang’ara na kuwapa Ivory Coast nguvu ya ushindi – na zaidi ya yote, kuendeleza heshima ya soka la Afrika Mashariki kwenye jukwaa la kimataifa.