Mkuu wa Mkoa wa Dar es Salaam, Albert Chalamila, ameonesha mshikamano mkubwa na mabingwa wa Ligi ya Kikapu ya Mkoa wa Dar es Salaam (DBL), Dar City, kwa kufanya ziara maalum katika kambi yao ya mazoezi na kutoa msaada wa mipira zaidi ya kumi pamoja na ahadi ya Shilingi milioni 10 endapo watafuzu hatua ya pili ya mashindano ya kimataifa ya Road to BAL.
Ziara hiyo ilifanyika usiku wa Jumatano, Oktoba 8, 2025, katika uwanja wa shule ya kimataifa ya IST, uliopo Masaki, ambapo kikosi cha Dar City kilikuwa kikifanya maandalizi ya mwisho kabla ya kuikaribisha timu kutoka Burundi na Uganda kwenye mashindano hayo ya kihistoria.
Chalamila alifika akiwa na ujumbe kutoka ofisi yake, na alipokelewa kwa shangwe na uongozi wa timu hiyo pamoja na mashabiki wachache waliokuwa wakifuatilia mazoezi hayo kwa karibu. Katika hotuba yake fupi, Chalamila aliipongeza Dar City kwa kuwa mabalozi wazuri wa Dar es Salaam na Tanzania kwa ujumla, huku akisisitiza kuwa michezo ni chombo muhimu cha kuunganisha jamii na kuinua vipaji vya vijana.
“Dar City si timu tu ya mkoa huu, bali ni nembo ya mafanikio kwa vijana wetu. Hii ni timu inayozidi kuonesha kuwa sisi Watanzania tuna uwezo wa kushindana kimataifa. Serikali iko pamoja nanyi,” alisema Chalamila.
Mbali na msaada wa mipira zaidi ya kumi uliokabidhiwa rasmi kwa nahodha wa timu hiyo, kiongozi huyo wa mkoa aliahidi kuwa iwapo Dar City itashinda michezo ya awali na kufuzu hatua inayofuata ya michuano hiyo, atahakikisha timu inapata Shilingi milioni 10 kama sehemu ya hamasa kutoka kwa serikali.
🎯 Usipitwe!
Kuwa wa kwanza kupata habari za moto za michezo nchini Tanzania na duniani kwa ujumla, moja kwa moja kwenye barua pepe yako kutoka SportsLeo Bongo!
- ✅ Matokeo ya mechi
- ✅ Uchambuzi wa kina
- ✅ Habari za ndanii ya timu zako pendwa
✉️ Quality content, no spam. Unsubscribe anytime.
“Hamasa si maneno tu, tunataka mkiingia uwanjani mjue kuwa mna watu milioni sita wa Dar es Salaam na serikali yao nyuma yenu. Milioni kumi ni motisha ya awali, lakini tutaendelea kushirikiana nanyi kila hatua,” aliongeza.
Kwa upande wake, kocha wa Dar City, alitoa shukrani kwa serikali kwa kutambua juhudi za vijana na kueleza kuwa msaada huo unawapa nguvu zaidi ya kupambana kwa bidii na kufikia malengo ya timu kimataifa.
Mashindano ya Road to BAL yanatarajiwa kuanza wiki ijayo, na Dar City imepangwa kucheza mechi mbili muhimu dhidi ya timu kutoka Uganda na Burundi. Maandalizi yanaendelea kwa kasi, huku mashabiki wa mchezo wa kikapu wakionyesha matumaini makubwa kwa mabingwa hao wa Dar es Salaam.
