Mabingwa wa kihistoria wa Ligi Kuu Tanzania Bara, Yanga SC, wanatarajiwa kushuka dimbani kesho katika Uwanja wa Sokoine jijini Mbeya kuumana na wenyeji Mbeya City FC, kwenye mchezo wa raundi ya pili wa ligi hiyo msimu wa 2025/26. Mchezo huu unatarajiwa kuwa wa kusisimua huku kila upande ukiingia na malengo ya kupata matokeo chanya.
Yanga SC, chini ya Kocha Mkuu Roman Folz, wanaingia kwenye mchezo huo wakiwa na alama 3 baada ya kuanza msimu kwa ushindi mnono wa mabao 3-0 dhidi ya Pamba Jiji, huku wakionesha dalili za timu iliyo na kiu ya mafanikio makubwa msimu huu. Kwa upande mwingine, Mbeya City wanaingia kwenye mchezo huu wakiwa na alama 3 pia, lakini wameshacheza michezo miwili – wakishinda mmoja na kupoteza mwingine. Katika mchezo wao wa mwisho, walipokea kichapo cha mabao 2-0 kutoka kwa Azam FC.
Akizungumza katika mkutano na waandishi wa habari kuelekea mchezo huo, Kocha Roman Folz wa Yanga SC alisema kuwa wanatarajia mechi kuwa ngumu, lakini malengo yao ni yale yale – kuhakikisha wanapata ushindi.
“Ni mchezo tofauti lakini malengo yanabaki yaleyale kama zilivyokuwa mechi nyingine. Tunakwenda kupambana tupate matokeo mazuri. Tunafahamu hautakuwa mchezo rahisi hivyo tutajaribu kufanya kila kitu kimbinu kuhakikisha tunafanya vizuri na tunatarajia kupata sapoti kubwa kutoka kwa mashabiki wetu hapo kesho,” alisema Folz kwa kujiamini.
Kwa upande mwingine, kocha huyo alipata nafasi ya kujibu baadhi ya maoni kutoka kwa mashabiki wanaohoji kuhusu aina ya soka linalochezwa na Yanga SC kwa sasa, wakidai kuwa timu hiyo haichezi soka la kuvutia kama ilivyokuwa misimu iliyopita. Hata hivyo, Folz alikuwa na mtazamo chanya kuhusu hilo.
“Nadhani tuna kikosi bora sana na kwa sasa tunapambana kufika kwenye ubora wa juu. Ni sawa watu kutoa maoni lakini sisi kama klabu ni lazima tuwe kitu kimoja nyakati hizi tunaposuka kitu kizuri kwa ajili ya timu yetu. Nadhani ndani ya kipindi kifupi kijacho tutakuwa sehemu nzuri sana,” aliongeza.
🎯 Usipitwe!
Kuwa wa kwanza kupata habari za moto za michezo nchini Tanzania na duniani kwa ujumla, moja kwa moja kwenye barua pepe yako kutoka SportsLeo Bongo!
- ✅ Matokeo ya mechi
- ✅ Uchambuzi wa kina
- ✅ Habari za ndanii ya timu zako pendwa
✉️ Quality content, no spam. Unsubscribe anytime.
Yanga SC imekuwa ikifanya usajili wa kimkakati katika misimu ya hivi karibuni na msimu huu haitaki kufumbia macho nafasi ya kurejesha heshima yake kama klabu bora Afrika Mashariki na Kati. Kikosi chao kimejumuisha wachezaji wa kiwango cha juu ndani na nje ya Tanzania, na mashabiki wake wanatarajia kuona mwendelezo wa matokeo chanya uwanjani.
Kwa Mbeya City, kucheza nyumbani mbele ya mashabiki wao ni faida ya kipekee, lakini pia changamoto kubwa ya kupambana dhidi ya moja ya timu bora zaidi kwenye historia ya soka la Tanzania. Kikosi hicho kinajivunia wachezaji chipukizi waliopandishwa kutoka akademi na wale waliopatikana kupitia usajili wa busara, ambao tayari wameanza kuonyesha ubora wao licha ya changamoto kwenye mchezo wa mwisho dhidi ya Azam.
Uwanja wa Sokoine mara zote umekuwa na mazingira magumu kwa timu za wageni, na mechi dhidi ya Yanga SC inatarajiwa kuuvuta umati mkubwa wa mashabiki, hasa ikizingatiwa ukubwa wa klabu hiyo na ushawishi wake wa kitaifa.
Mchezo huu ni muhimu sana kwa kila upande. Kwa Yanga, ushindi utakuwa ni njia sahihi ya kuendeleza morali ya mwanzo mzuri wa msimu na kuweka presha kwa wapinzani wao wa jadi Simba SC na Azam FC. Kwa Mbeya City, ni nafasi ya kurekebisha makosa ya mechi iliyopita na kuonyesha kuwa wana uwezo wa kusumbua vigogo wa soka la Tanzania.
Mashabiki wa soka nchini kote wanatarajiwa kufuatilia kwa karibu mchezo huu wa “Super Saturday” huku jiji la Mbeya likitarajiwa kuwaka moto wa burudani ya soka.
