Klabu ya Yanga SC imeendeleza makali yake katika michuano ya Ligi ya Mabingwa Afrika baada ya kuibuka na ushindi wa mabao 2-0 dhidi ya Williete Benguela ya Angola katika mchezo wa marudiano uliofanyika kwenye Uwanja wa Benjamin Mkapa, jijini Dar es Salaam. Ushindi huo unaifanya Yanga kufuzu hatua ya pili ya mashindano hayo kwa jumla ya mabao 5-0, baada ya awali kushinda 3-0 ugenini nchini Angola.
Mchezo huu uliovutia maelfu ya mashabiki wa soka, ulionyesha ubora wa kikosi cha Yanga kilicho chini ya kocha kijana kutoka Ufaransa, Roman Folz, ambaye ameendelea kutumia mbinu ya rotation kwa wachezaji wake bila kupunguza makali ya timu. Licha ya kutoshambulia kwa nguvu katika dakika za mwanzo, Yanga ilionesha umakini mkubwa katika safu ya ulinzi na kiungo, hali iliyowaweka wachezaji wa Benguela kwenye wakati mgumu wa kupata mianya ya kupenya.
Kipindi cha kwanza kilimalizika kwa matokeo tasa, huku Yanga ikitumia zaidi mipira mirefu na kushambulia kwa kushtukiza kupitia winga wake wa kasi. Mashabiki waliokuwa wamefurika Mkapa walionekana kuhamasisha kikosi chao kila mara, wakiamini kuwa muda wowote mabao yangepatikana.
Dakika ya 57, ubao wa matangazo ulitingishwa baada ya nyota wa Ivory Coast, Pacome Zouzoua, kufunga bao la kwanza kwa ustadi mkubwa. Zouzoua alimalizia pasi murua kutoka kwa kiungo mshambuliaji Feisal Salum, akiweka uhai mpya kwa mashabiki wa Yanga waliolipuka kwa shangwe. Bao hilo liliwapa wachezaji ujasiri zaidi huku wakitawala mchezo kwa pasi fupi fupi na mipira ya kasi.
Benguela walijaribu kurejea kwenye mchezo lakini safu ya ulinzi ya Yanga ikiongozwa na Rushine De Reuck na Dickson Job ilikuwa imara, ikihakikisha hakuna shambulizi hatari lililopenya. Dakika ya 74, Yanga waliongeza bao la pili kupitia kwa kijana anayekuja juu, Aziz Andabwile, aliyemalizia kwa utulivu mpira wa krosi kutoka kwa beki Shaban Djuma. Bao hilo liliufanya mchezo kuwa na ladha zaidi kwa mashabiki wa nyumbani ambao hawakukosa nyimbo na vigelegele.
🎯 Usipitwe!
Kuwa wa kwanza kupata habari za moto za michezo nchini Tanzania na duniani kwa ujumla, moja kwa moja kwenye barua pepe yako kutoka SportsLeo Bongo!
- ✅ Matokeo ya mechi
- ✅ Uchambuzi wa kina
- ✅ Habari za ndanii ya timu zako pendwa
✉️ Quality content, no spam. Unsubscribe anytime.
Kocha Folz baada ya mchezo alisifu nidhamu ya wachezaji wake na kupongeza mashabiki kwa kujitokeza kwa wingi, akisisitiza kuwa lengo lao ni kusonga mbali zaidi msimu huu. “Tulicheza kwa umakini, tukaheshimu mpinzani wetu na tumefuzu kwa kishindo. Safari bado ni ndefu lakini naamini tuna kikosi chenye uwezo wa kushindana na timu kubwa barani,” alisema Folz.
Kwa ushindi huu, Yanga SC imeonesha dhamira ya dhati ya kuendeleza rekodi nzuri katika mashindano ya kimataifa, huku wapenzi wa soka wakitarajia makubwa zaidi kutoka kwa mabingwa hao wa Tanzania. Safari ya hatua ya pili sasa inatazamwa kwa matumaini makubwa, mashabiki wakiamini “Mfumo umetiki” na kwamba timu yao inaweza kuandika historia mpya msimu huu.
