Klabu ya Coastal Union ya Tanga imemtambulisha rasmi Kocha Mohamed Omary Muya kuwa kocha mkuu mpya wa timu hiyo, kuchukua nafasi ya Ally Ameir ambaye amemaliza muda wake wa kuwanoa “Wagosi wa Kaya”. Uamuzi huo umetangazwa leo kupitia taarifa rasmi ya klabu hiyo, ambapo uongozi umeeleza kuwa uteuzi wa Kocha Muya ni sehemu ya mkakati mpya wa kuimarisha kikosi kuelekea mashindano ya Ligi Kuu Tanzania Bara msimu huu.
Kocha Mohamed Muya anajiunga na Coastal Union akitokea klabu ya Geita Gold inayoshiriki Ligi ya Championship, ambapo alikuwa akihudumu kama kocha mkuu. Katika kipindi chake na Geita Gold, Muya alionesha uwezo mkubwa wa kuandaa na kulea vipaji vya wachezaji chipukizi, sambamba na kuiwezesha timu hiyo kuwa na ushindani mkali katika ligi hiyo ya daraja la pili kwa ubora nchini.
Akizungumza baada ya kutambulishwa, Kocha Muya amesema anafurahia kurejea katika Ligi Kuu na kuahidi kushirikiana kwa karibu na wachezaji, benchi la ufundi, pamoja na viongozi wa Coastal Union ili kuhakikisha timu inapata mafanikio. “Ni heshima kubwa kupewa jukumu hili. Coastal Union ni klabu yenye historia kubwa, na nitahakikisha tunarejesha makali ya timu hii kwa kufanya kazi kwa bidii na nidhamu,” alisema Muya.
Kwa upande wake, uongozi wa Coastal Union umempongeza Kocha Muya kwa kukubali kujiunga na timu hiyo na umeonesha imani kuwa uzoefu na mbinu zake zitaleta mabadiliko chanya ndani ya kikosi. “Tunatambua uwezo wa Kocha Muya na tunaamini atatusaidia kufikia malengo ya msimu huu. Tunamtakia kila la heri katika majukumu yake mapya,” ilisema sehemu ya taarifa ya klabu hiyo.
🎯 Usipitwe!
Kuwa wa kwanza kupata habari za moto za michezo nchini Tanzania na duniani kwa ujumla, moja kwa moja kwenye barua pepe yako kutoka SportsLeo Bongo!
- ✅ Matokeo ya mechi
- ✅ Uchambuzi wa kina
- ✅ Habari za ndanii ya timu zako pendwa
✉️ Quality content, no spam. Unsubscribe anytime.
Coastal Union, ambayo imekuwa na mabadiliko kadhaa ya benchi la ufundi katika misimu ya hivi karibuni, inatarajia kutumia uzoefu wa Muya kurejesha ushindani wake katika ligi, hasa ikizingatiwa ushindani mkali uliopo kutoka kwa klabu zingine kongwe nchini kama Yanga, Simba, na Azam.
Kocha Muya anatarajiwa kuanza kazi mara moja kuandaa kikosi chake kwa michezo ijayo ya ligi, ambapo matarajio ya mashabiki wa Coastal Union ni kuona timu yao ikirejea kwenye nafasi za juu za msimamo wa ligi na kushindania nafasi za mashindano ya kimataifa.
