Kocha wa klabu ya Azam Fc Rachid Taoussi ameendelea kufurahia ushindi wa 1-0 ilioupata klabu yake dhidi ya Klabu ya Yanga sc katika mchezo uliofanyika siku ya Jumamosi iliyopita katika uwanja wa Chamazi Complex jijini Dar es Salaam.
Licha ya kuchukua alama tatu pia ushindi huo umeipandisha Azam Fc mpaka katika nafasi ya nne ya msimamo wa ligi kuu ya Nbc baada ya kufikisha alama 21.
Pia Taoussi anafurahia kuisimamisha rekodi ya Yanga sc ya kutofungwa mchezo wowote katika ligi kuu ya Nbc nchini sambamba na ile ya kutoruhusu bao katika michezo hiyo nane ya ligi kuu huku akiipunguza kasi ya kuelekea kutwaa ubingwa wa ligi kuu mapema.
Kocha huyo alisema kuwa walifanikiwa kuwadhibiti Yanga sc kwa kuwabana wasipate nafasi ya kupiga pasi kama ilivyo kawaida yao.
“Nawashukuru mashabiki wetu kwa kutuunga mkono, tunahitaji zaidi ya hapo kwa sababu sisi ni klabu kubwa. Kuanza kushinda dhidi ya klabu yenye nguvu kama Yanga ni hatua nzuri sana kwetu,” alisema Taoussi aliyechukua nafasi ya Yousouph Dabo klabuni hapo
Akizungumzia maandalizi ya mechi hiyo, alisema walihakikisha wanadhibiti kasi ya washambuliaji wa Yanga kwa kupanga safu ya ulinzi iliyokuwa imara.
“Tulifanya mpango mzuri wa kuweka uwiano kati ya mashambulizi na ulinzi, na hilo liliweza kutusaidia sana.
Hii ni mara ya pili kwa Azam Fc kuiharibia Yanga sc kwa kuifunga katika ligi kuu ambapo pia msimu uliopita walifanya hivyo kwa kuibamiza mabao 2-1 katika mchezo uliofanyika katika uwanja wa Benjamin Mkapa jijini Dar es Salaam.
