Fei,Zayd Warejea Azam Fc

Klabu ya Azam FC imepata habari njema kuelekea mchezo wao mgumu wa Kombe la Shirikisho Barani Afrika dhidi ya AS Maniema Union baada ya nyota wao wawili muhimu, Feisal Salum ‘Fei Toto’ na Yahya Zayd, kuthibitishwa kuwa tayari kurejea uwanjani kufuatia kupona majeraha yaliyokuwa yakiwasumbua.

Mkuu wa Idara ya Habari na Mawasiliano wa klabu hiyo, Thabit Zakaria maarufu Zakazakazi, amesema  kuwa wawili hao walifanya mazoezi ya mwisho jana katika kambi ya timu hiyo kama sehemu ya maandalizi ya safari yao kuelekea jijini Kinshasa, DR Congo, ambapo Azam inakwenda kusaka alama muhimu kwenye mchezo wa kwanza wa  hatua ya makundi ya kombe la shirikisho utakaopigwa Jumapili, Novemba 23 mwaka huu.

Zakazakazi amesema kuwa vijana hao wameonekana kuwa katika hali nzuri, wana ari, morali na utayari wa kupambana, jambo ambalo limeleta matumaini makubwa ndani ya kikosi hicho cha Chamazi kinachoamini msimu huu ni wao kufanya mambo makubwa Afrika.

FEI TOTO ARUDI BAADA YA SARE NA NAMUNGO

Feisal Salum, mmoja wa viungo tegemeo kwenye kikosi cha Azam, aliumia katika mchezo wa Ligi Kuu ya Tanzania Bara dhidi ya Namungo FC, mechi ambayo ilimfanya kushindwa kuendelea kutokana na maumivu hayo na baadaye akaondolewa kwenye kikosi cha Taifa Stars kilichokuwa kimeingia kambini kwa michezo ya kimataifa.

Kwa muda siku kadhaa mashabiki walikuwa wakihoji hali yake, huku wengi wakihofia kuwa huenda angekosekana kwa muda mrefu, kutokana na aina ya jeraha alilopata. Hata hivyo, habari mpya kutoka ndani ya timu zimethibitisha kuwa amefanya kazi kubwa chini ya madaktari wa klabu na sasa yuko fiti asilimia mia moja, tayari kuivaa Maniema Union.

ZAYD NAYE APONA BAADA YA KUUMIA MAZOEZINI

Kama ilivyokuwa kwa Fei Toto, Yahya Zayd naye alikosekana kwenye mchezo huo wa Namungo FC, baada ya kupata jeraha mazoezini wakati kikosi hicho kikijiandaa na pambano hilo. Majeruhi hayo yalikuwa pigo kubwa kwa benchi la ufundi, kwani Zayd ni mmoja wa wachezaji wanaotegemewa kwa kasi yake, ubunifu na uwezo wa kutengeneza nafasi za mabao.

Lakini jana, macho ya wadau wa soka Chamazi yalirudi na tabasamu baada ya kumuona akirudi mazoezini kwa nguvu, akifanya mazoezi yote bila kuonyesha dalili zozote za maumivu. Hili limetafsiriwa kama habari njema zaidi kwa Kocha Mkuu wa Azam ambaye sasa anapata uhuru wa kupanga kikosi kamili bila kuhofia pengo la wachezaji muhimu.

AZAM YAONDOKA LEO, MORALI IPO JUU

Kikosi cha Azam kinatarajiwa kuondoka nchini leo mchana kuelekea jijini Kinshasa, safari ambayo imekuwa ikizungumziwa kwa msisimko na mashabiki wa klabu hiyo wakiamini timu ina nafasi kubwa ya kufanya vizuri kwenye mchezo wa mzunguko huu wa michuano ya CAF.

Taarifa zinaeleza kuwa wachezaji wote waliobaki kwenye kikosi wako katika hali nzuri, na benchi la ufundi limefanya marekebisho yote muhimu ya kimkakati kabla ya kuelekea katika ardhi ya Congo DR ambako wanatarajiwa kukutana na mashabiki wenye presha ya nyumbani.

Zakazakazi alisisitiza kuwa Azam inakwenda Congo ikiwa na lengo moja tu: kupambana mwanzo mwisho na kuhakikisha wanarejea Dar es Salaam wakiwa na matokeo mazuri.

“Tumepata habari njema kwa Fei na Zayd kurejea. Hawa ni wachezaji wenye uzito mkubwa kwenye kikosi chetu. Tunakwenda Kinshasa kupambana, na tunaamini vijana wetu wataonyesha thamani yao,” alisema Zakazakazi.

MASHABIKI WAFUNGA MITANDAO KWA HAMASA

Katika mitandao ya kijamii, mashabiki wa Azam wamekuwa wakiandika ujumbe wa pongezi kwa wachezaji hao waliopona na kuwatakia safari njema kikosi kizima. Wengi wanaamini kurudi kwa viungo hao wawili kutaleta uhai mpya katika eneo la kati ambalo lilionekana kukosa ubunifu katika mechi mbili zilizopita.

Kwa ujumla, kurejea kwa Fei Toto na Zayd kunachukuliwa kama silaha kubwa kwa Azam kuelekea mchezo wa Novemba 23,pambano ambalo linaweza kuamua mustakabali wa safari yao ya michuano ya kimataifa msimu huu.