Simbu Aifuata Heshima Ufaransa

Mwanariadha nyota wa kimataifa kutoka Tanzania na askari mahiri wa Jeshi la Wananchi wa Tanzania (JWTZ), Staff Sajenti Alphonce Simbu, ameweka historia nyingine mpya baada ya kuondoka nchini mapema leo asubuhi, Novemba 27, 2025, kuelekea nchini Ufaransa kwa ajili ya kushiriki moja ya hafla kubwa zaidi duniani katika medani ya riadha,Tuzo za Wanariadha Bora wa Mwaka 2025 zinazoandaliwa na Shirikisho la Riadha la Dunia (World Athletics).

Simbu, ambaye ni mmoja wa majina makubwa Afrika katika mbio ndefu, ameondoka kupitia Uwanja wa Ndege wa Kimataifa wa Julius Nyerere (JNIA), akipeperusha bendera ya Tanzania na JWTZ kwa kujiamini, huku akisisitiza kuwa safari hii inaenda kuandika ukurasa mpya kwenye maisha yake ya mchezo. Wakati akipokewa na wanahabari kabla ya kuingia kwenye sehemu ya ukaguzi, alionekana mtulivu kama kawaida yake, tabasamu la upande likionyesha kujiamini huku akivalia nembo za timu yake ya JWTZ.

MAJAJI WA DUNIA WAMWEKA KATI YA VIGOGO 12 WA 2025

Kwa mujibu wa ratiba ya Shirikisho la Riadha Duniani, hafla hiyo itafanyika Novemba 30, 2025, katika jiji la kifahari la Monaco, nchini Ufaransa. Tuzo hizo huwakutanisha wanariadha 12 waliofanya vizuri zaidi duniani katika mwaka husika, ambao kupitia vigezo mbalimbali, huchujwa kutoka mamia ya wanariadha wa viwango vya juu.

Katika kundi la vipengele tofauti ikiwamo mbio za uwanjani, mbio za barabarani, kurusha, kuruka na taji maalumu za ubora,Simbu ameingizwa kwenye orodha ya mwisho inayowataja wakali wawili wanaowania tuzo ya “Mwanariadha Bora wa Mbio za Nje ya Uwanja kwa Wanaume (Out of Stadium Men’s Athlete of the Year).”

Hii ni heshima kubwa kwa nchi, ikizingatiwa kwamba katika hatua za awali walikuwapo makumi ya wanariadha kutoka mabara yote, lakini baada ya mchujo mkali na kura za mashirika ya riadha, makocha, wanahabari wa kimataifa na jopo la majaji, Simbu amebaki kwenye ‘final two’ akipambana na mpinzani mmoja tu Sebastian Sawe wa Kenya.

MPAMBANO WA FAINALI: SIMBU VS SAWE

Katika mbio za marathoni, jina la Simbu halihitaji utangulizi mrefu kwa mashabiki wa michezo barani Afrika na duniani. Kwa miaka ya karibuni, amekuwa miongoni mwa wanariadha wenye rekodi thabiti, akimaliza ndani ya nafasi za juu kwenye marathoni zenye ushindani mkubwa kama Tokyo, London na World Championships.

Mpinzani wake, Sawe, naye ni moto wa kuotea mbali katika mbio ndefu, akiwa amepata mafanikio makubwa katika mwaka 2025, jambo lililowafanya majaji kuwaita wawili hao kwenye hatua ya mwisho kama wawakilishi wa ubora wa bara la Afrika.

Lakini kwa Watanzania, ushindani huu sio tu kuhusu tuzo, bali ni heshima ya taifa kwani mara ya mwisho mwanariadha wa Tanzania kufika kwenye hatua kubwa ya aina hii ilikuwa miaka mingi iliyopita.

SIMBU: “NINAENDA KUWAJIBU KWA KAZI, SI MANENO”

Akizungumza kwa ufupi na waandishi kabla ya kupanda ndege, Simbu alisema anajisikia fahari kubwa kuwakilisha Watanzania na JWTZ, na kwamba anachukua safari hii kama tuzo ya jitihada za muda mrefu.

“Ninaenda kufanya kile ambacho nimekuwa nikifanya kila siku kuwa mwakilishi mzuri wa nchi yangu. Heshima hii si yangu peke yangu; ni ya Watanzania wote, mashabiki, viongozi wa michezo, na jeshi langu lililonilea katika nidhamu. Nitakuwa Monaco nikijibu kwa kazi, si kwa maneno,” alisema Simbu kwa utulivu wake wa kawaida.

Baadhi ya wanariadha wenzake na makocha wa JWTZ waliofika kumuaga waliamini kuwa mwaka huu ni nafasi ya Simbu kuonyesha dunia kwamba Tanzania bado inazalisha wakali wa riadha, kama ilivyokuwa miaka ya nyuma enzi za Filbert Bayi na Suleiman Nyambui.

TAIFA LAJIVUNIA—JWTZ WAONGOZA DUA

Jeshi la Wananchi, kupitia kitengo cha michezo, limesema linajivunia mafanikio ya mwanariadha wake huyo ambaye kwa miaka mingi amekuwa mfano wa nidhamu, uchapakazi na uzalendo. Msemaji wa JWTZ alitoa kauli fupi akisema:

“Simbu ni askari wa mfano. Tunataka tuone akirejea na tuzo, lakini hata kama hatashinda, ameshatutambulisha vizuri kimataifa.”

Mashabiki wa michezo nchini, hasa wale wa riadha, wamefurika mitandaoni wakimtakia heri, wengine wakiweka picha za mbio zake za ushindi, huku wengi wakisema Wanatamani kuona bendera ya Tanzania ikipandishwa katika jukwaa la dunia.

MONACO INAMSUBIRI – NAFASI YA DHAMBI, NAFASI YA HESHIMA

Monaco ni moja ya majiji yanayojulikana kwa kuandaa hafla kubwa na zenye hadhi ya kifalme, hivyo ujio wa Simbu utaweka Tanzania katika ramani ya michezo kimataifa kwa siku kadhaa zijazo. Tuzo hizi huwa na athari kubwa katika hadhi ya mwanariadhahuongeza thamani katika usponsor, mashindano makubwa na mwaliko wa kimataifa.

Kwa sasa macho ya Watanzania yapo Monaco, wakisubiri kuona kama Simbu ataandika historia ya kuwa Mtanzania wa Kwanza kushinda tuzo ya duniani ya World Athletics kwa eneo la mbio za nje ya uwanja.