SOLSKJÆR Kurejea Manchester United
Klabu ya Manchester United imeingia katika mazungumzo ya ndani yanayolenga kumrejesha aliyekuwa kocha wao, Ole Gunnar Solskjær, kama kocha wa muda (caretaker manager) hadi mwishoni mwa msimu huu, kwa mujibu wa taarifa kutoka vyanzo mbalimbali zilizo karibu na klabu hiyo.
Hatua hiyo inatajwa kuwa sehemu ya mkakati wa dharura wa uongozi wa Mashetani Wekundu, unaolenga kutuliza hali ndani ya timu baada ya matokeo yasiyoridhisha yaliyoikumba klabu hiyo katika kipindi cha karibuni. Uongozi wa United unaelezwa kutafuta suluhisho la muda litakalorejesha utulivu, morali ya wachezaji na imani ya mashabiki, huku mchakato wa kumpata kocha wa kudumu ukiendelea kwa umakini mkubwa.
Solskjær, raia wa Norway, si jina geni kwa mashabiki wa Old Trafford. Mbali na kuwa mmoja wa wachezaji waliotengeneza historia kubwa ndani ya klabu hiyo hasa kwa bao lake la ushindi katika fainali ya Ligi ya Mabingwa Ulaya mwaka 1999 pia aliwahi kupewa jukumu la ukocha wa mpito mnamo Desemba 2018 baada ya kuondolewa kwa Jose Mourinho.
Katika kipindi hicho cha awali kama kocha wa muda, Solskjær aliiongoza Manchester United katika mechi 19 za mashindano yote, akipata ushindi 14, sare mbili na kupoteza mechi tatu pekee. Rekodi hiyo ilionyesha ufanisi mkubwa, ikiwa ni tofauti ya mabao 40–17 na asilimia 74 ya ushindi takwimu zilizowafanya mashabiki wengi wa United kuamini kuwa klabu ilikuwa imepata mtu sahihi wa kuirejesha kwenye njia ya mafanikio.
Matokeo hayo mazuri yaliifanya bodi ya klabu kumthibitisha Solskjær kama kocha mkuu wa kudumu, uamuzi ambao baadaye ulikumbwa na changamoto kadhaa, ikiwamo kushuka kwa kiwango cha timu na presha kubwa ya ushindani katika Ligi Kuu England. Hata hivyo, wachambuzi wengi wa soka wanasema kuwa rekodi yake kama kocha wa muda ilikuwa tofauti kabisa na kipindi chake cha baadaye kama kocha wa kudumu.
Kwa mujibu wa taarifa, baadhi ya viongozi wa Manchester United wanaamini kurejea kwa Solskjær kama kocha wa muda kunaweza kuleta athari chanya kwa haraka, hasa kutokana na uelewa wake wa mazingira ya klabu, historia, pamoja na namna ya kushughulikia presha kutoka kwa mashabiki na vyombo vya habari. Aidha, inasemekana kuwa ana uhusiano mzuri na baadhi ya wachezaji wa sasa na wale waliowahi kucheza chini yake, jambo linaloweza kusaidia kurejesha mshikamano ndani ya kikosi.
Mashabiki wa United wamegawanyika kuhusu uwezekano wa kurejea kwake. Wapo wanaoamini kuwa Solskjær ndiye mtu sahihi wa kuleta utulivu wa muda na kumaliza msimu kwa heshima, huku wengine wakihofia kuwa kurejeshwa kwake kunaweza kuonekana kama kurudi nyuma badala ya kusonga mbele. Hata hivyo, wengi wanakubaliana kuwa kama ni kwa muda mfupi, anaweza kuwa chaguo salama kuliko kufanya maamuzi ya haraka yasiyo na mwelekeo wa muda mrefu.
Kwa upande wake, Solskjær hajatoa kauli yoyote rasmi kuhusu taarifa hizo, lakini vyanzo vya karibu vinaeleza kuwa yuko tayari kusaidia klabu endapo atapewa jukumu hilo, akisisitiza kuwa Manchester United bado ni sehemu muhimu ya maisha yake ya soka.
Uongozi wa klabu unaendelea kufanya tathmini ya kina kabla ya kufanya uamuzi wa mwisho, huku ukizingatia ratiba ngumu ya mechi zinazokuja pamoja na malengo ya klabu kumaliza msimu katika nafasi bora zaidi. Ikiwa mazungumzo hayo yatafanikiwa, kurejea kwa Solskjær kunaweza kutangazwa wakati wowote.
Taarifa zingine zinadai kuwa mabosi hao pia wanaangalia uwezekano wa kumchukua kiungo wa zamani wa klabu hiyo Michael Carrick katika nafasi hiyo endapo dili la Solskjaer litakua gumu kukamilika kwa wakati ambao unahitajika au ikiwezekana basi kuwachukua wote kwa pamoja waunde kikosi kazi cha kuipambania klabu hiyo.
Kwa sasa, macho ya mashabiki wa Mashetani Wekundu yako Old Trafford, wakisubiri kuona kama historia itajirudia na kama “mtoto wa klabu” huyo atarejea tena kuongoza jahazi la United katika kipindi hiki kigumu, kwa matumaini ya kumaliza msimu kwa tabasamu.