Camara Nje Wiki 8,Kufanyiwa Upasuaji Morocco

Kipa namba moja wa Simba SC, Mousa Camara, anatarajiwa kusafiri kuelekea Morocco kesho Novemba 15 kwa ajili ya kufanyiwa upasuaji wa goti litakalomweka nje ya uwanja kwa kipindi cha kati ya wiki nane hadi kumi, hatua inayofanya benchi la ufundi la mabingwa hao wa zamani wa Ligi Kuu bara kuanza kufumua mipango mipya ya muda mfupi na mrefu.

Camara alipata jeraha hilo katika mchezo wa kufuzu hatua ya makundi ya kombe la klabu bingwa barani Afrika dhidi ya Nsingizini Hotspurs uliopigwa kwenye Uwanja wa Benjamin Mkapa, tukio lililowatoa hofu mashabiki wa Wekundu wa Msimbazi baada ya nyota huyo kuonekana akishindwa kuendelea na mchezo na hatimaye kutolewa nje kwa msaada wa timu ya madaktari.

Taarifa kutoka ndani ya klabu hiyo zinaeleza kuwa madaktari wa Simba pamoja na wataalamu waliomfanyia vipimo vya kina nchini, walikubaliana kwa pamoja kwamba njia sahihi ya kuhakikisha kipa huyo anarudi kwenye ubora wake wa awali ni kufanyiwa upasuaji, mkakati ambao uongozi wa klabu umeuunga mkono bila kusita.

Kulingana na ratiba iliyowekwa, Camara atafanyiwa upasuaji huo Jumatatu, Novemba 17, katika kituo maalum cha tiba ya michezo kinachotajwa kuwa miongoni mwa bora barani Afrika. Baada ya upasuaji, atabaki nchini humo kwa wiki chache za awali kwa ajili ya uchunguzi na uangalizi wa karibu kabla ya kurejea Dar es Salaam kuanza programu maalum ya rehabilitation chini ya benchi la ufundi na idara ya tiba ya michezo ya Simba.

Katika kipindi chote atakachokuwa nje, nafasi yake itaendelea kuzibwa na kipa mwenye uwezo mkubwa, Yakub Seleman, ambaye ameonekana kuaminiwa na benchi la ufundi kutokana na kiwango alichokionesha mara kadhaa alipopewa nafasi kwenye mashindano mbalimbali dhidi ya Hussein Abel.

Hata hivyo, kutokuwepo kwa Camara ni pigo kubwa kwa Simba, kwani kipa huyo amekuwa mhimili mkuu wa kikosi hicho tangu alipotua Msimbazi akitokea Afrika Magharibi. Zaidi ya kuwa na utulivu mkubwa, Camara amekuwa na uwezo wa kuongoza safu ya ulinzi, jambo lililoifanya Simba kuwa na uimara wa ziada katika mechi kubwa na zenye presha.

Kinachosikitisha zaidi kwa mashabiki wa Wekundu wa Msimbazi ni kwamba Camara atakuwa nje ya mchezo muhimu wa Kariakoo Derby dhidi ya Yanga SC unaotarajiwa kupigwa mwezi Desemba, mechi ambayo kwa kawaida imekuwa ikiamsha hisia kali na ushindani mkubwa ndani na nje ya uwanja. Kukosekana kwa kipa wao namba moja katika pambano hilo kunachukuliwa kama pengo linaloweza kuathiri kwa kiasi kikubwa mipango ya kocha.

Aidha, Simba itamkosa Camara katika michezo kadhaa ya michuano ya kimataifa ya hatua ya makundi, ambako uzoefu wake umechangia sana katika kuipa klabu hiyo matokeo mazuri katika misimu iliyopita. Benchi la ufundi limedai kuwa litajipanga ipasavyo kuhakikisha timu haiathiriki sana, huku Seleman akitazamiwa kupewa maelekezo ya ziada ili kuchukua jukumu hilo kwa muda.

Kupitia taarifa fupi kutoka ndani ya klabu, imeelezwa kuwa Simba inatambua umuhimu wa Camara kwa timu na ndiyo maana ilichukua hatua za haraka kuhakikisha anapata matibabu bora. Uongozi umeahidi kufuatilia hali yake kwa karibu na kuhakikisha nyota huyo anarudi uwanjani akiwa imara zaidi ya alivyokuwa.

Kwa sasa, mashabiki wa Simba wanaendelea kumtakia heri kipa wao huyo, wakitumai kwamba safari yake ya matibabu itakwenda vizuri na kurejea kwake kutaleta nguvu mpya katika kampeni za ndani na kimataifa. Wakati Camara akianza safari ya kupona, jukumu la kuilinda lango la Wekundu wa Msimbazi linahamia kwa Yakub Seleman kipenzi kipya cha mashabiki wanaotamani kuona timu yao ikiendelea kupambana hadi dakika ya mwisho.