Samata Kuachia Ngazi Taifa Stars
Nahodha wa Timu ya Taifa ya Tanzania, Mbwana Samata, ameibua hisia nzito kwa mashabiki wa soka nchini baada ya kudokeza uwezekano wa kutoshiriki michuano ya Kombe la Mataifa ya Afrika (AFCON) mwaka 2028, akieleza kuwa anahisi nguvu na makali ya kupambana katika kiwango cha juu yanazidi kupungua, hivyo yuko tayari kuwaachia wengine jukumu hilo.
Samata aliyasema hayo mapema jana usiku wakati akizungumza na waandishi wa habari mara baada ya Taifa Stars kutoka sare ya 1–1 dhidi ya Uganda katika mchezo wa raundi ya pili ya Kundi C wa AFCON 2025. Matokeo hayo yameifanya Stars ijikute katika presha kubwa, ikilazimika kuifunga Tunisia kwenye mchezo wa mwisho wa kundi ili kufuzu hatua ya 16 bora ya mashindano hayo.
“Nimekuwa nikitafakari kwa muda sasa. Nimeitumikia timu ya taifa kwa miaka mingi kwa moyo wote. Lakini kuna wakati mchezaji anatakiwa kuwa mkweli kwa nafsi yake. Nimeanza kuhisi kwamba nguvu za kupambana kwa kiwango cha juu kama hiki zinapungua, na naamini kuna vijana wengi wanaokuja kwa kasi ambao wanastahili nafasi,” alisema Samata kwa sauti ya utulivu lakini yenye uzito mkubwa.
Kauli hiyo ya nahodha huyo imeibua mjadala mpana miongoni mwa wadau wa soka, mashabiki na wachambuzi, wengi wakimtambua Samata kama mmoja wa wachezaji waliolitumikia Taifa Stars kwa uaminifu na mafanikio makubwa kwa zaidi ya muongo mmoja.
Samata, aliyekuwa nahodha kwenye mchezo dhidi ya Uganda, bado anaendelea kuwa mhimili muhimu ndani na nje ya uwanja. Hata hivyo, alisema kipaumbele chake kwa sasa ni kuhakikisha Stars inafanya vizuri AFCON 2025 kabla ya kufikiria hatua yake ijayo kimataifa.
“Kwanza kabisa akili yangu ipo kwenye mchezo dhidi ya Tunisia. Tunajua ni mchezo mgumu sana, lakini bado tuna nafasi. Kikosi kipo vizuri, morali ipo, na tunaamini tunaweza kupata ushindi. Baada ya hapo, tutakaa chini kufikiria mustakabali,” aliongeza.
Nyota huyo wa zamani wa TP Mazembe, KRC Genk na Aston Villa ameichezea Taifa Stars tangu mwaka 2009, akiwa mmoja wa wachezaji waliodumu kwa muda mrefu zaidi katika kikosi cha taifa. Katika kipindi hicho, Samata amefunga mabao 20 kwa jezi ya Taifa Stars, akibaki miongoni mwa wafungaji bora wa muda wote wa timu hiyo, huku Simon Msuva akiwa juu kidogo kwa mabao 21.
Safari ya Samata katika soka la kulipwa imejaa mafanikio makubwa yanayomfanya atajwe kama mmoja wa wachezaji bora kuwahi kutokea Tanzania. Mwaka 2015 ulikuwa kilele cha mafanikio yake barani Afrika, aliposhinda tuzo ya Mchezaji Bora wa Mwaka wa Afrika kwa wachezaji wa ligi za ndani, baada ya kuiongoza TP Mazembe kutwaa taji la Ligi ya Mabingwa Afrika. Katika msimu huo, Samata pia alimaliza akiwa mfungaji bora wa michuano hiyo, akiweka rekodi zilizodumu kwa muda mrefu.
Mafanikio hayo yalimfungulia mlango wa soka la Ulaya, ambapo Januari 2016 alijiunga na KRC Genk ya Ubelgiji. Ndani ya muda mfupi, Samata alijipambanua kama mshambuliaji hatari, akiisaidia Genk kufuzu michuano ya Europa League na hatimaye kushinda taji la Ligi Kuu ya Ubelgiji (Belgian Jupiler Pro League) mwaka 2019.
Msimu huo wa 2018/2019 ulikuwa wa kihistoria kwake binafsi, akimaliza akiwa mfungaji bora wa ligi hiyo na kutwaa tuzo ya Ebony Shoe, inayotolewa kwa mchezaji bora wa asili ya Afrika anayecheza nchini Ubelgiji. Mafanikio hayo yaliendelea kuipa Tanzania heshima kubwa katika ramani ya soka la kimataifa.
Januari 2020, Samata aliandika historia nyingine baada ya kusajiliwa na klabu ya Aston Villa ya England, na kuwa Mtanzania wa kwanza kucheza na kufunga bao katika Ligi Kuu ya England (EPL). Bao lake dhidi ya Bournemouth lilibaki kuwa kumbukumbu muhimu kwa soka la Tanzania, likithibitisha kuwa wachezaji wa Kitanzania wanaweza kufika na kufanya vizuri kwenye majukwaa makubwa duniani.
Licha ya changamoto za majeraha na mabadiliko ya mara kwa mara ya klabu katika miaka ya hivi karibuni, Samata ameendelea kuwa kiongozi wa mfano kwa wachezaji chipukizi ndani ya Taifa Stars. Wachezaji wengi vijana wamekuwa wakimnukuu kama chanzo cha motisha na mshauri muhimu kambini.
Kocha wa Taifa Stars, Miguel Gamondi, alipoulizwa kuhusu kauli ya Samata, alisema ni mapema sana kufanya maamuzi ya aina hiyo, akisisitiza umuhimu wa uzoefu wake ndani ya kikosi. “Samata ni kiongozi mkubwa. Uzoefu wake ni hazina. Lakini mwisho wa siku, maamuzi ya mchezaji yanapaswa kuheshimiwa,” alisema Gamondi.
Kadri presha ya mchezo dhidi ya Tunisia inavyokaribia, macho ya Watanzania yote yataelekezwa kwa Samata na wenzake, wakisubiri kuona kama nahodha huyo ataiongoza Stars kwenye ushindi muhimu ambao unaweza kuwa ushindi wa kwanza kwa Tanzania katika michuano hiyo ama huenda ukawa ni miongoni mwa sura zake za mwisho mwisho kama alivyosema katika jukwaa kubwa la AFCON.
