Singida Bss Yamsajili Lanso wa Kmc
Baada ya kufanikisha kumrudisha nyumbani mshambuliaji Joseph Guede aliyekuwa akiichezea Al Wehdat SC ya Jordan kwa mkataba wa mkopo, Singida Black Stars inaendelea kuonyesha dhamira yake ya kujenga kikosi imara kwa msimu ujao baada ya kufikia makubaliano na beki wa kulia wa KMC, Abdallah Said Ali maarufu ‘Lanso’.
Taarifa za kuaminika kutoka ndani ya kambi ya Singida zinaeleza kuwa mabosi wa klabu hiyo tayari wameshamalizana na Lanso, ambaye amekubali kujiunga na kikosi hicho kwa mkataba wa miaka mitatu, hatua inayotajwa kuwa pigo kwa KMC na faida kubwa kwa timu hiyo ya Singida.
Lanso, ambaye alijiunga na KMC Januari 13, 2024 akitokea Mlandege ya Zanzibar, alikuwa na mkataba unaotarajiwa kumalizika Januari 2026. Hata hivyo, beki huyo aligoma kuongeza mkataba mpya wa kuendelea kusalia ndani ya kikosi hicho cha Manispaa ya Kinondoni, hali iliyowapa nafasi Singida Black Stars kuingia kwa kasi na kunyakua saini yake.
Chanzo cha karibu na mchezaji huyo kimeeleza kuwa mazungumzo kati ya pande hizo mbili yalikuwa yakiendelea kwa utulivu kwa muda, kabla ya hatimaye kufikia makubaliano ya mwisho, huku Lanso akivutiwa zaidi na mpango wa muda mrefu wa Singida Black Stars pamoja na mazingira ya ushindani ndani ya kikosi hicho.
“Ni kweli Lanso ameshamalizana na Singida. Ametia saini mkataba wa miaka mitatu. Amevutiwa na malengo ya klabu na namna wanavyojenga timu yenye ushindani,” kilieleza chanzo hicho kilichoomba hifadhi ya jina.
Ujio wa Lanso unaonekana kuja kuimarisha eneo la ulinzi la Singida Black Stars, hususan upande wa kulia, eneo ambalo mara kadhaa limekuwa likitajwa kuwa na upungufu wa kina na ushindani wa kutosha. Beki huyo anatajwa kuwa na uwezo mkubwa wa kukaba, kupandisha mashambulizi na kutoa krosi zenye macho, sifa zinazomfanya kuwa mchezaji anayependa kushambulia sambamba na majukumu ya ulinzi.
Tangu ajiunge na KMC, Lanso alifanikiwa kujijengea jina ndani ya Ligi Kuu Bara kutokana na nidhamu yake ya uchezaji, kasi na uwezo wa kucheza dakika nyingi bila kushuka kiwango. Alikuwa miongoni mwa wachezaji waliokuwa wakiaminiwa zaidi na benchi la ufundi la KMC kabla ya msimu huu kukumbwa na changamoto za matokeo.
Kwa upande wa Singida Black Stars, usajili wa Lanso unaonekana kuwa sehemu ya mpango mpana wa klabu hiyo wa kuimarisha kikosi chake ili kiweze kushindana vikali katika Ligi Kuu Bara pamoja na michuano mingine ya ndani. Tayari klabu hiyo imeonyesha nia ya kufanya mabadiliko makubwa baada ya kumrejesha Joseph Guede, ambaye anatajwa kuwa silaha muhimu katika safu ya ushambuliaji.
Mabosi wa Singida wamekuwa wakisifika kwa kufanya usajili wa kimkakati, wakilenga wachezaji wenye uzoefu wa ligi na uwezo wa kuhimili presha ya ushindani. Kupatikana kwa Lanso kunatajwa kuwa ushindi mkubwa hasa ikizingatiwa kwamba amesajiliwa kama mchezaji huru, bila Singida kulipa ada ya uhamisho.
Kwa upande wa KMC, kuondoka kwa Lanso ni pigo jingine katika kipindi ambacho klabu hiyo inapitia mabadiliko mbalimbali ndani na nje ya uwanja. Tayari kikosi hicho kimekuwa kikihusishwa na kuondoka kwa wachezaji kadhaa, hali inayolazimisha uongozi wake kuanza upya mchakato wa kujenga timu.
Wadau wa soka wanaamini kuwa uhamisho wa Lanso kwenda Singida Black Stars utaongeza ushindani mkubwa katika nafasi ya beki wa kulia ndani ya ligi, huku ukitoa ujumbe wazi kuwa Singida imejipanga kwa muda mrefu na siyo kushiriki ligi kama wapita njia.
Kwa sasa, kinachosubiriwa ni utambulisho rasmi wa beki huyo ndani ya kikosi cha Singida Black Stars, huku mashabiki wa timu hiyo wakisubiri kwa hamu kuona namna atakavyoongeza nguvu na ushindani katika kikosi chao kuelekea msimu mpya wa mashindano.