Yanga waachana na Khomeiny, macho yote kwa Yona Amosi
Mabingwa watetezi wa Ligi Kuu Bara, Yanga sc, wameamua kuachana na mlinda mlango Aboubakary Khomeiny baada ya kushindwa kulishawishi benchi la ufundi la kikosi hicho, hatua inayofungua ukurasa mpya katika eneo la ulinzi wa lango la timu hiyo ya Jangwani.
Taarifa kutoka ndani ya klabu hiyo zinaeleza kuwa uamuzi wa kumuacha Khomeiny umefikiwa baada ya tathmini ya kina ya benchi la ufundi, likiangalia ushindani uliopo, kiwango cha wachezaji waliopo pamoja na mwelekeo wa baadaye wa kikosi hicho, hasa katika nafasi ya mlinda mlango.
Khomeiny, ambaye alipewa nafasi chache msimu uliopita, alicheza jumla ya dakika 270 katika michezo mitatu pekee, akifanikiwa kukusanya clean sheets mbili. Licha ya takwimu hizo kuonekana si mbaya, bado hazikutosha kumshawishi kocha kumpa nafasi ya kudumu mbele ya walinda lango wenzake.
Katika msimu huo huo, mlinda mlango Mshery alionyesha kiwango cha juu zaidi baada ya kucheza dakika 360 katika michezo minne, akimaliza akiwa na clean sheets nne mfululizo, takwimu zilizompa nafasi ya kuaminiwa zaidi na benchi la ufundi la Yanga.
Msimu huu hali imeendelea kuwa ngumu zaidi kwa Khomeiny. Hadi sasa, Mshery tayari amecheza michezo miwili na kuibuka na clean sheets mbili, hali inayoendelea kuimarisha nafasi yake ndani ya kikosi hicho. Khomeiny, kwa upande mwingine, hajapata hata dakika moja ya kucheza, jambo lililoashiria wazi kuwa nafasi yake ndani ya Yanga imekuwa finyu zaidi.
Chanzo cha ndani ya klabu kimeeleza kuwa benchi la ufundi lilihitaji mlinda mlango ambaye si tu atatoa ushindani mkubwa, bali pia mwenye uzoefu wa kucheza mechi nyingi mfululizo bila kushuka kiwango, jambo ambalo wameona halipo kwa Khomeiny kwa sasa.
Katika mchakato wa kutafuta mbadala, jina la Yona Amosi limeibuka kwa nguvu. Kiwango bora alichoonyesha mlinda mlango huyo msimu uliopita akiwa na Pamba Jiji kimewavutia zaidi mabosi wa Yanga, wakiamini anaweza kuongeza ushindani na ubora katika safu ya ulinzi wa lango.
Yona Amosi alicheza jumla ya michezo 28 msimu uliopita, akikusanya clean sheets 11, akifanya saves 69, takwimu zinazoonyesha wazi uwezo wake wa kuokoa na kuisaidia timu yake katika nyakati ngumu. Zaidi ya hapo, alichaguliwa kuwa mchezaji bora wa mechi katika michezo mitatu, jambo linaloonyesha mchango wake mkubwa ndani ya uwanja.
Uwezo wake wa kusoma mchezo, utulivu akiwa langoni pamoja na ujasiri wa kukabiliana na mashambulizi ya wapinzani unatajwa kuwa ndiyo sababu kubwa iliyowafanya Yanga kumuweka juu ya orodha yao ya walinda lango wanaowahitaji.
Si mara ya kwanza kwa Yanga kumfuatilia Yona Amosi. Mlinda mlango huyo alikuwa karibu kujiunga na mabingwa hao tangu msimu wa 2023–24 alipokuwa akiichezea Tanzania Prisons, lakini dili hilo lilifia njiani kimya kimya kutokana na sababu ambazo hazikuwekwa wazi.
Safari yake ya baadaye kwenda Pamba Jiji ilimpa nafasi ya kucheza mara kwa mara, jambo lililomsaidia kuonyesha ubora wake na hatimaye kuvutia macho ya klabu kubwa kama Yanga.
Kwa kuachana na Khomeiny na kumuelekeza macho kwa Yona Amosi, Yanga inaonekana wazi imeamua kuweka mkazo zaidi kwenye ushindani na ubora katika eneo la mlinda mlango, ikiwa ni sehemu ya maandalizi ya kuhakikisha kikosi chake kinaendelea kuwa imara katika mashindano ya ndani na ya kimataifa.
Kwa sasa, kinachosubiriwa ni kuona kama safari hii dili la Yona Amosi litakamilika au historia itajirudia, lakini jambo moja liko wazi, Yanga hawataki kufanya mzaha na eneo la ulinzi wa lango lao.