Klabu ya Simba SC hatimaye imevunja ukimya na kumtangaza rasmi kocha wa zamani wa Gaborone United ya Botswana, Dimitri Pandev, kuwa meneja mkuu mpya wa kikosi hicho baada ya kuondoka kwa kocha Fadlu Davis aliyejiunga na Raja Athletic Club ya Morocco. Ujio wa Pandev unakuja katika wakati ambapo Simba SC inajiandaa na changamoto kubwa za Ligi Kuu Tanzania Bara na michuano ya kimataifa, ikilenga kurejesha makali yake na kufikia malengo makubwa msimu huu.
Simba SC imelazimika kuvunja mkataba wa kocha huyo na klabu ya Gaborone United, jambo lililothibitisha kwa mara nyingine dhamira ya Wekundu wa Msimbazi kuhakikisha wanapata mtu sahihi wa kusimamia mfumo na falsafa yao ya kisoka. Pandev ametia saini mkataba wa miaka miwili na atatambulika rasmi kama meneja mkuu wa kikosi, akipewa dhamana ya kupanga mikakati na kutoa maamuzi ya kiufundi ndani ya uwanja.
Hata hivyo, kutokana na kukosa leseni maalumu inayotakiwa na Shirikisho la Soka Afrika (CAF) na Shirikisho la Soka Tanzania (TFF), Pandev hataruhusiwa kukaa kwenye benchi la ufundi katika mechi za Simba SC. Badala yake, kocha msaidizi Selemani Matola ndiye atakayesimama rasmi kama kocha mkuu kwenye makaratasi ya klabu, kwa mujibu wa taratibu na kanuni, japo ukweli unabaki kwamba maamuzi yote ya kiufundi yatakuwa mikononi mwa Pandev.
Ujio wa Pandev umepokelewa kwa shauku kubwa na mashabiki wa Simba SC, ambao kwa muda mrefu wamekuwa wakihitaji kocha mwenye mbinu mpya na uwezo wa kuirejesha timu kwenye ramani ya mafanikio barani Afrika. Hii ni ishara ya mabadiliko makubwa ndani ya benchi la ufundi, ambapo Simba SC inatarajia kurejea katika ubora wa kiwango cha juu na kuwapa mashabiki burudani na matokeo bora.
Kwa sasa macho yote ya wapenzi wa soka nchini yapo kwa Pandev, ambaye ataongoza mazoezi ya kwanza kama meneja mkuu hivi karibuni. Shabaha kubwa ya uongozi ni kuona Simba SC ikifanya vizuri ndani ya ligi, na zaidi, kufika mbali katika Ligi ya Mabingwa Afrika. Wekundu wa Msimbazi wameweka wazi kuwa ujio wa Pandev sio tu kuongeza mvuto, bali ni sehemu ya mkakati wa muda mrefu wa kuijenga timu imara na ya ushindani kimataifa.
