Morocco Vs Zambia:Morroco Yafuzu 16 Bora Afcon
Timu ya Taifa ya Morocco imejibu presha ya mchezo wa mwisho wa hatua ya makundi kwa kishindo baada ya kuichapa Zambia mabao 3-0 katika mchezo wa Kundi A wa Kombe la Mataifa ya Afrika (AFCON) 2025 uliochezwa Jumatatu usiku, na hivyo kumaliza kama vinara wa kundi hilo wakiwa na pointi saba.
Katika mchezo huo uliochezwa mbele ya maelfu ya mashabiki walioufurika Uwanja wa Prince Moulay Abdellah, wenyeji Morocco walionyesha dhamira, nidhamu na ubora wa hali ya juu tangu dakika za mwanzo, wakitawala kila eneo la uwanja na kuwanyima Zambia nafasi ya kupumua.
Morocco, chini ya kocha Walid Regragui, waliingia uwanjani wakijua ushindi ungewaweka kileleni mwa kundi bila kutegemea matokeo ya mechi nyingine. Kuanzia filimbi ya kwanza, walicheza kwa kasi, pasi za haraka na mpangilio mzuri wa kiufundi uliowafanya Zambia waonekane kama wageni wasiokuwa na majibu.
Dakika ya tisa tu ilitosha kwa mashabiki wa Atlas Lions kushangilia bao la kwanza. Kupitia mpango mzuri wa kona fupi kutoka upande wa kulia, Azzedine Ounahi alipokea mpira na kuachia krosi iliyopimwa vyema kuelekea nguzo ya pili. Ayoub El Kaabi, aliyekuwa huru kabisa, aliruka juu bila kusumbuliwa na mabeki wa Zambia na kuupiga mpira kwa kichwa uliotikisa nyavu, akimshinda golikipa Toaster Nsabata Mwanza.
Bao hilo lilizidi kuwapa Morocco kujiamini, huku Zambia wakionekana kupoteza mwelekeo. Ounahi aliendelea kuwa injini ya timu hiyo, akiongoza mashambulizi na kudhibiti kiungo kwa pasi za akili na harakati zisizochoka.
Dakika ya 27, Morocco waliongeza bao la pili kwa mtindo uliodhihirisha ubora wa kiufundi waliokuwa nao. Ounahi alipiga pasi ya kupenya mabeki upande wa kushoto kwa Abde Ezzalzouli, ambaye alikimbia kwa kasi na kuachia krosi ya chini iliyoikata safu ya ulinzi ya Zambia. Ingawa mpira ulimpita El Kaabi aliyekuwa amekimbia kujaribu kufunga, uliangukia miguu ya Brahim Diaz aliyekuwa peke yake. Kwa utulivu mkubwa, Diaz aliupiga mpira kwa mguu wa kushoto na kumtungua Mwanza, akifanya matokeo kuwa 2-0 kabla ya mapumziko.
Zambia walijaribu kujipanga upya kipindi cha pili wakitarajia kupata bao la mapema, lakini matumaini yao yalizimwa haraka na Morocco waliorejea uwanjani wakiwa na moto uleule wa kipindi cha kwanza.
Dakika ya 53 ilishuhudia bao la tatu lililozua shangwe kubwa uwanjani. Tena, mpango wa mpira wa adhabu fupi ulitumika, ambapo Ounahi alipandisha mpira ndani ya eneo la hatari. El Kaabi, akiwa amepokea mpira kwa mgongo kuelekea lango, alionyesha ufundi wa hali ya juu kwa kupiga mpira wa ‘bicycle kick’ uliomshinda Mwanza na kujaa wavuni.
Awali mwamuzi msaidizi alinyanyua bendera kuashiria kuwa El Kaabi alikuwa ameotea, lakini baada ya VAR kuingilia kati, bao hilo lilithibitishwa kuwa halali. Hilo lilikuwa bao la pili la El Kaabi katika mchezo huo, akitimiza brace na kuua kabisa matumaini ya Zambia kurejea mchezoni.
Baada ya bao hilo, Morocco walipunguza kasi kidogo lakini waliendelea kumiliki mpira na kudhibiti mchezo hadi filimbi ya mwisho. Zambia, licha ya mabadiliko kadhaa ya kikosi, walishindwa kabisa kuleta tishio lolote kubwa langoni mwa Morocco.
Ushindi huo unawafanya Morocco kumaliza hatua ya makundi wakiwa na pointi saba kileleni mwa Kundi A, wakifuatiwa na Mali ambao pia wamefuzu baada ya kutoka sare ya bila kufungana na Comoros katika mchezo mwingine wa kundi hilo. Zambia na Comoros wameaga mashindano hayo.
Kwa matokeo haya, Morocco wanazidi kujiweka katika nafasi nzuri ya kuwania ubingwa wakiwa nyumbani, huku kocha Regragui akionyesha kuwa kikosi chake kiko tayari kukabiliana na presha na ushindani mkubwa wa hatua za mtoano.
Mashabiki wa Atlas Lions sasa wana sababu ya kutabasamu, wakiamini kuwa safari ya timu yao katika AFCON 2025 bado ina ukurasa mzuri mbele, hasa kwa kiwango walichokionesha dhidi ya Zambia katika mchezo huu wa maamuzi.
Baada ya mchezo huo Ayoub El Kaabi Mchezaji Bora wa Mechi (TotalEnergies Man of the Match) alisema kuwa “Tulimaliza tukiwa vinara wa kundi letu. Hilo ndilo lilikuwa lengo letu kuu, na lina maana kwamba tutabaki hapa Rabat. Sasa mashindano mapya yanaanza, ambayo hayana nafasi ya kufanya makosa. Tutapumzika kidogo, lakini muhimu zaidi tutajipanga na kujiandaa vizuri kwa changamoto zinazofuata.”
Kwa upande wa Moses Sichone Kocha wa Zambia alisema kuwa “Ilikuwa siku ngumu kwetu kutokana na namna mchezo ulivyokwenda. Ukiangalia kwa ujumla wa mchezo, nadhani tuliwapa Morocco heshima kubwa kupita kiasi. Baadhi ya wachezaji walionekana kuwa na woga, lakini kwa hakika nawapongeza Morocco. Ni siku ya maumivu kwetu kwa sababu tulijiandaa sana kwa ajili ya mchezo huu, lakini sidhani kama tulijitokeza uwanjani kwa kiwango tulichopaswa. Morocco walitumia vyema udhaifu wetu na kukosa kujiamini, na kwa bahati mbaya hilo ndilo lilikuwa matokeo yake. Tulionekana bora zaidi kipindi cha pili, lakini ilikuwa tayari ni kuchelewa sana.”
Akiwa na furaha Walid Regragui Kocha wa Morocco alisema kuwa “Tulicheza vizuri na tulikuwa na mpango madhubuti ambao ulifanya kazi kama tulivyopanga. Haikuwa mechi rahisi, lakini kutokana na mpango mzuri wa mchezo, tuliweza kupata matokeo tuliyohitaji na kukata tiketi ya kufuzu. Sisi ni wenyeji, hivyo tunapaswa kucheza kila mechi kama fainali. Tuna mashabiki wanaotuunga mkono kwa nguvu kubwa, na ndiyo sababu wachezaji wote wanajituma kwa kiwango cha juu katika kila mchezo. Tunatazamia kwa hamasa hatua za mtoano na tutaendelea kufanya kazi kwa bidii.”
